Zëdhënësja e Partisë Demokratike, Floriana Garo, ka reaguar ndaj pretendimeve se PD dhe Sali Berisha nuk mbështesin kërkesat e protestës qytetare, duke i cilësuar ato si manipulime dhe trillime të qëllimshme.
Sipas Garos, Partia Demokratike dhe Berisha mbështesin plotësisht pesë kërkesat e paraqitura nga përfaqësuesit e protestës qytetare, si edhe kërkesat e tjera të artikuluara nga tribuna e saj publike. Ajo akuzoi Edi Ramën dhe mediat pranë qeverisë se po përpiqen të krijojnë konfuzion duke paraqitur deklarata individuale të protestuesve si qëndrime zyrtare të protestës.
“Berisha dhe PD mbështesin plotësisht pesë kërkesat e paraqitura nga përfaqësuesit e protestës rinore qytetare. Edi Rama, përmes mediave të tij, me qëllim të keq për të sulmuar protestën dhe kërkesat e drejta, i konfondon ato me prononcime individuale të ndonjë protestuesi, duke i paraqitur si qëndrime të vetë protestës”, deklaroi Garo.
Në përfundim, ajo tha se PD dënon atë që e cilësoi si praktikë manipulimi nga qeveria dhe kërkoi dorëheqjen e menjëhershme të kryeministrit Edi Rama, si dhe pranimin e kërkesave të paraqitura nga përfaqësuesit e protestës qytetare.
