Gjykata Kushtetuese ka vendosur të pranojë pjesërisht kërkesën e 38 deputetëve të Kuvendit dhe ka detyruar Kuvendin të ngrejë komisionin hetimor parlamentar për kontrollin e ligjshmërisë së veprimtarisë së organeve të pushtetit qendror dhe vendor, si dhe për verifikimin e përdorimit të burimeve të administratës shtetërore për qëllime elektorale në zgjedhjet e 11 majit 2025.
Vendimi është marrë pas shqyrtimit të kërkesës së një grupi deputetësh, të cilët kundërshtuan mosmiratimin nga Kuvendi të dy komisioneve hetimore: njërit për çështjen McGonigal dhe tjetrit për administrimin e burimeve shtetërore gjatë zgjedhjeve.
Sipas njoftimit të Gjykatës Kushtetuese, gjykata vlerësoi se kërkesa për ngritjen e komisionit hetimor për çështjen McGonigal nuk plotëson kriteret kushtetuese për t’u detyruar Kuvendi ta ngrejë. Për këtë pjesë, kërkesa u rrëzua, pasi Gjykata nuk arriti shumicën e nevojshme për të vlerësuar se ishin përmbushur kushtet kushtetuese për ngritjen e komisionit.
Ndryshe ka vendosur për komisionin hetimor që lidhet me zgjedhjet e 11 majit 2025. Gjykata arriti në përfundimin se ky komision përmbush kriteret kushtetuese dhe jurisprudencën e saj për komisionet hetimore parlamentare.
Për pasojë, Gjykata Kushtetuese vendosi:
* Pranimin e pjesshëm të kërkesës së deputetëve;
* Zgjidhjen e mosmarrëveshjes së kompetencës ndërmjet një të katërtës së deputetëve dhe Kuvendit;
* Përcaktimin e detyrimit të Kuvendit për ngritjen e Komisionit Hetimor “Për kontrollin e ligjshmërisë së veprimtarisë së organeve të pushtetit qendror dhe pushtetit vendor, si dhe për të verifikuar përdorimin e burimeve të administratës shtetërore për qëllime elektorale në zgjedhjet e 11 majit 2025”;
* Shfuqizimin si antikushtetues të vendimit nr. 78/2025 të Kuvendit, me të cilin ishte rrëzuar projektvendimi për ngritjen e këtij komisioni.
Gjykata saktëson se vendimi është përfundimtar dhe hyn në fuqi ditën e botimit në Fletoren Zyrtare, ndërsa arsyetimi i plotë do të publikohet brenda afateve ligjore.
Ky është një nga vendimet më të rëndësishme të Gjykatës Kushtetuese në raport me të drejtën e pakicës parlamentare për të ngritur komisione hetimore, pasi detyron Kuvendin të krijojë një komision që do të hetojë pretendimet për përdorimin e administratës shtetërore në funksion të zgjedhjeve të 11 majit 2025.
