Deputeti i Partisë Socialiste, Eduart Shalsi, ka reaguar ndaj deklaratave të kreut të PD-së, Sali Berisha, gjatë seancës së sotme parlamentare. Shalsi kritikoi ashpër Berishën, duke e cilësuar si një figurë të tejkaluar politikisht që po pengon zhvillimin e opozitës.
“Sali Berisha e kishte gjithë mundësinë që pas disfatës lapidar të 2013 të tërhiqej nga jeta politike dhe t’i hapte udhën dikujt tjetër. E provoi me Lulin, por ashtu siç e bëri, ashtu dhe e zhbëri,” deklaroi Shalsi, duke aluduar për mungesën e lidershipit të qëndrueshëm brenda PD-së.
Deputeti socialist e akuzoi Berishën se po mban peng jo vetëm një grup parlamentar, por edhe një popull opozitar që ka nevojë për përfaqësim të vërtetë. “Nuk je më përfaqësues i tyre. Jeni të zgjuar për ta kuptuar që koha e Saliut ka perënduar njëherë e mirë,” shtoi ai.
Shalsi e përmbylli fjalën e tij duke e cilësuar Berishën si një “rudiment politik” që po përballet me një fund jo dinjitoz të karrierës së tij.
