Dy muaj pas vrasjes së Martin Canit pranë shkollës "Fan Noli" në Tiranë, prindërit e tij vijojnë të bëjnë thirrje për drejtësi. Këtë të shtunë, shoqëria civile organizoi një tjetër protestë, ku prindërit kërkuan siguri më të madhe për fëmijët e tyre.
Mes protestuesve ndodheshin edhe prindërit e Martinit, Engjëlli dhe Florina Cani.
“Besoj se heshtja vret më shumë se gjithçka tjetër. Kanë kaluar dy muaj që përjetojmë këtë dramë të rëndë. Nuk kemi marrë asnjë reagim, as nga prokuroria, as nga shkolla, as nga shëndetësia. Martini u dërgua në spitalin ushtarak, por atje nuk kishin pajisjet e nevojshme për të mbajtur zemrën në funksion. Sot është fëmija im, nesër mund të jetë fëmija i dikujt tjetër. Duhet të bashkohemi për këtë kauzë, sepse situata është përtej alarmit. Jemi të kapluar nga frika dhe u bëjmë thirrje institucioneve të na dëgjojnë. Prokurorja na tha se do të kishim një përgjigje, por deri tani kemi marrë vetëm heshtje. Dhe heshtja vret,” deklaroi Engjëll Cani.
Nëna e Martinit, Florina, theksoi se kërkon vetëm drejtësi për jetën e humbur të djalit të tyre.
Martin Cani, 14 vjeç, u vra me thikë nga një bashkëmoshatar. Në konfliktin mes nxënësve mbeti i plagosur edhe shoku i tij, Luis Mecaj. Prokuroria po vijon hetimet për këtë ngjarje tronditëse dhe pritet të ngrejë akuza zyrtare ndaj autorit të dyshuar, i cili është gjithashtu i mitur.
Pas kësaj tragjedie, protesta të shumta shpërthyen në të gjithë vendin. Qeveria reagoi duke vendosur mbylljen e rrjetit social TikTok, si një masë për të adresuar problemet që lidhen me sigurinë e të rinjve.
