Bibloteka Kombëtare, godinë historike do të zhvendoset nga vendndodhja e saj. Grigels Muçollari, anëtar i kryesisë së PD, ka denoncuar se Edi Rama ka vendosur që këtë institucion kyç të kulturës dhe kombit ta degdisë në periferi të Tiranës, me një projekt aspak transparent. "Sipas këtij njoftimi që ka nxjerrë Korporata e Investimeve, thjesht mësohet se Biblioteka Kombëtare do të jetë në zonën që njihet si “Vilat Gjermane”. Nuk dihet asgjë se me çfarë do të shpërblehet fituesi i paracaktuar, një mik i Edi Ramës. A do të ketë fatin dhe ky ansambël këtu buzë Sheshit Skënderbej, si shumëkund, të kthehet në biznes fitimprurës klientelist, në një kullë qindra milionë euroshe? Biblioteka Kombëtare e Shqipërisë nuk është pronë e Edi Ramës. Ky institucion kult i përket qytetarëve dhe shqiptarëve. Duket se ka një nxitim të kryeministrit për të çuar shpejt e shpejt deri në fund planin që ka për pronat shtetërore për t’i ndarë me miqtë e tij".
