Adela Kondakçiu, bashkëpunëtore e drejtësisë në dosjen Veliaj, një prej bashkëpunëtoreve më të ngushta të Ajola Xoxës, paraqiti mbrojtjen e saj para GJKKO.
Përmes një avokati, deklaroi se qëllimi i saj nuk ka qenë përfitimi.
Avokati deklaroi se Kondakçiu ka pranuar të marrë pjesë në aktivitetin kriminal, por e shtyrë dhe e ndikuar nga urdhrat e Xoxës.
“Jo vetëm që nuk ka përfituar, por është vënë në dispozicion të drejtësisë dhe ka pasur kosto për transparencën e saj. Ka ndihmuar në zbardhjen e së vërtetës për organet e drejtësisë”, deklaroi mbrojtësi ligjor.
Ish-polici i burgjeve, Fatjon Baçi, i cili është marrë i pandehur pasi i dha Erion Veliajt telefonin e tij të bënte telefonata gjatë kohës që po e transferonin nga paraburgimi në Gjykatë, kërkoi një dënim më të butë.
“Fatjon Baçi ka bërë një gabim njerëzor përballë një njeriu si Erion Veliaj që gëzonte pushtetin që gëzonte. Veliaj ka biseduar me vëllain dhe gruan e tij dhe nuk ka bërë asnjë bisedë kriminale, përndryshe nuk do t’ia jepte celularin. Kërkoj që Gjykata të më japë një dënim më të lehtë duke marrë në konsideratë se nuk kam pasur qëllim kriminal dhe duke marrë parasysh rrethanat familjare që jam i vetmi njeri i punësuar në shtëpinë time”, theksoi avokatja e tij.
Pas kësaj, avokatët kërkuan shtyrjen e seancës gjyqësore për të plotësuar konkluzionet përfundimtare. Prokurorët e konsideruan kërkesën të padrejtë, ndërsa gjykata vendosi shtyrjen e seancës për datën 23 korrik.
Për Ajola Xoxën dhe disa të pandehur ështe pranuar gjykimi i shkurtuar dhe po gjykohen veçmas nga Veliaj
