Aleksandër Koçeku dyshohet të jetë vrarë për motive hakmarrjeje. Kjo është pista ku janë përqendruar hetuesit për të hedhur dritë mbi krimin e rëndë që tronditi Shkodrën, ku Koçeku u gjet i vrarë brenda automjetit në aksin rrugor Prekal-Kir. Ekzekutimi ndodhi vetëm pak orë pasi VNA publikoi vendimin e Prokurorisë së Shkodrës për zgjatjen edhe me tre muaj të hetimeve ndaj tij për dosjen e vrasjes së Pavlin Prekës. Kjo përkon në kohë me zhvillimet e fundit hetimore, ndërsa autoritetet po verifikojnë nëse ekziston ndonjë lidhje mes ngjarjeve.
Koçeku ishte nën hetim nga Prokuroria e Shkodrës, pasi dyshohej se ishte i përfshirë në vrasjen e Pavlin Prekës më 26 shkurt 2025 në oborrin e shtëpisë në fshatin Guci e Re në Shkodër. Për vrasjen e Prekës janë arrestuar Vasel Koçeku dhe Klaudio Lisaj, ndërsa Aleksandër Koçeku po hetohej në gjendje të lirë, për shkak se ndaj tij deri më tani nuk ishin gjetur prova të mjaftueshme për ta çuar nën masën e arrestit.
Pavlin Preka u qëllua për vdekje, pasi planifikonte të rrëmbente vajzën e Vasel Koçekut me qëllim për t’u fejuar me të, ndonëse ajo ishte e mitur dhe nuk kishte shprehur pëlqim.
VNA më herët gjatë ditës informoi se Prokuroria e Shkodrës kishte vendosur zgjatjen e hetimeve për të dyshuarit e vrasjes së Prekës edhe për tre muaj të tjerë.
