Këtë të dielë, vendi ynë do të jetë nën ndikimin e kushteve atmosferike të paqëndrueshme. Moti pritet të jetë me vranësira dhe reshje shiu, të cilat do të jenë të herëpashershme gjatë gjithë ditës dhe do të intensifikohen në formën e shtrëngatave deri në orët e pasdites, duke prekur shumicën e territorit.
Sipas Shërbimit Meteorologjik Ushtarak, në Alpe dhe në zonat malore mbi 1000-1200 metra, kryesisht në veri, verilindje dhe juglindje, priten reshje dëbore me intensitet të ulët, dhe lokalisht mund të arrijnë deri në mesatar.
Era do të fryjë nga juglindja, me shpejtësi mesatare prej 4-12 m/s deri në orët e mesditës, ndërsa në lugina dhe përgjatë bregdetit mund të arrijë shpejtësi deri në 14-21 m/s, duke shkaktuar dallgëzim të forcës 3-5 ballë. Pas mesditës, intensiteti i erës pritet të rritet, duke arritur 7-16 m/s.
Gjithashtu, priten mjegull të dendur në disa zona, me shikueshmëri të reduktuar në orët e mëngjesit dhe të mbrëmjes, si dhe gjatë periudhave të reshjeve, njofton Shërbimi Meteorologjik Ushtarak.
