Autoriteti Portual Vlorë ka njoftuar pezullimin e lundrimit për mjetet e vogla të peshkimit, pas përkeqësimit të kushteve hidrometeorologjike me reshje shiu dhe temperatura të ulëta në vend. Ndalimi i paisjes me leje-nisje për mjetet lundruese dhe ato të peshkimit që operojnë në det të hapur ka hyrë në fuqi që nga ora 10:00 e mëngjesit të sotëm.
Në njoftimin e shpërndarë, autoriteti ka theksuar se drejtuesit e mjeteve të vogla lundruese dhe anijeve të peshkimit duhet të kenë parasysh kushtet atmosferike dhe të marrin masat për sigurinë e tyre. Ndërkohë, anijet e transportit ndërkombëtar detar do të vazhdojnë të operojnë normalisht sipas destinacioneve të përcaktuara.
Sipas informacionit të dhënë, përmirësimi i kushteve hidrometeorologjike dhe heqja e ndalimit për mjetet e vogla lundruese pritet të ndodhë pas orës 22:00.
