Belind Këlliçi i ka dhënë sot ultimatum SPAK-ut që ose të çojë para ligjit Erion Veliajn, ose të mbyllë institucionin. Ish-rivali i Veliajt për postin e kryetarit të Bashkisë ka mbledhur sot për herë të 39-të përpara bashkisë disa dhjetëra mbështetës që kërkojnë largimin e kryebashkiakut të Tiranës.
Edhe pse nuk kanë arritur ta largojnë me 39 protesta, Këlliçi ende shpreson se presioni i demokratëve do ta detyrojë Erion Veliajn të largohet nga zyra e tij. Ndërsa ka dorëzuar disa dhjetëra padi në SPAK kundër Veliajt, Këlliçi vijon të shprehë mosbesim ndaj strukturës së posaçme që po heton kryebashkiakun dhe familjarët e tij.
Megjithatë, dikush duhet t’i kujtojë zotit Këlliçi se hetimet kanë një agjendë të caktuar, të cilën nuk e përcaktojnë as Rama dhe as Berisha. Për çështje të ndjeshme dhe të rëndësishme, SPAK kërkon kohë – ndoshta po aq sa iu desh për dosjet e Ahmetajt, Kokës apo Beqajt.
Nxitimi i Këlliçit për të shmangur nga gara e vitit të ardhshëm Erion Veliajn është legjitim dhe i motivuar politikisht. Por jo detyrimisht SPAK nuk mundet të ketë në agjendë “pastrimin” e rrugës nga rivalët për zotin Këlliçi.
