Sot në Prishtinë mbahet mbledhja e dy qeverive, të Shqipërisë dhe Kosovës. Në Parlament kryeministra dhe deputetë të dy vendeve po mbajnë fjalime. Berisha nga selia e PD, në një konferencë për media tha se në Kosovë do shkonte vetëm pasi të votohej rezoluta që dënon gjenocidin serb. Por përkundrejt deklaratave dhe qëndrimeve të kreut të PD, kreu i grupit parlamentar, Gazment Bardhi ka shkuar në Kosovë, madje ka mbajtur edhe një fjalim kundër Ramës në përkrahje të Albin Kurtit. Deklaratat Berisha: “Nuk do shkoja në asnjë rrethanë pa votuar rezolutën për të dënuar gjenocidin serb në Kosovë. Pa kërkesë ndjese, vërtet qeveria përfaqëson, por janë qytetarët e Kosovës gjithashtu, por duhet kërkuar ndjesë qytetarëve të Kosovës për sanksionet që vuri Shqipëria. Duhet kërkuar ndjesë qytetarëve të Kosovës për bashkërendimin me Vuçicin që veriu i Kosovës të merrej në dorëzim nga NATO. Duhet kërkuar ndjesë qytetarëve të Kosovës për përpjekjet për të përmbysur qeverinë e vet, gjer te ndalimi i këngës, himnit të Adem Jasharit, akti më simbolik, më domethënës". Bardhi: "Ne shqiptarët kemi një traditë vëllait nuk ia themi kurrë këshillën në publik, në lagje, vëllait këshillit ia themi në shtëpi me zë të ulët që të mos e dëgjojnë të tjerët. E kundërta e kësaj një këshillë edhe kur është e drejtë e thënë në publik, e lëndon vëllain, e dobëson pozitën e tij në arenën ndërkombëtare, dhe sigurisht është një thikë pas shpine për vëllain tonë Kosovën".
