Kryetarë të disa partive të reja shprehën qëndrimet e tyre kritike ndaj punës së SPAK dhe drejtësisë së re.
Pano Soko theksoi se ndonëse i kanë dhënë mbështetje SPAK-ut duke depozituar padi, institucionet e drejtësisë nuk kanë ndjekur deri në fund dosjet e mëdha, si ajo e inceneratorëve. Ai kritikoi SPAK-un për moskryerjen e detyrës, duke e quajtur këtë një ndërhyrje të tërthortë në zgjedhje.
"Ne përpiqemi të jemi realistë. Ne kemi qenë ata që i kemi dhënë besim SPAK-ut. Kemi ndërmarrë akte, sepse kemi dashur të besojmë se një drejtësi e re mundëson garë të barabartë. Ka një ide që thonë se SPAK po ndërhyn në zgjedhje duke sakatuar partitë e mëdha dhe duke na lehtësuar punën partive të reja. Në fakt, besoj se SPAK duke mos bërë punën e vet ka ndërhyrë në zgjedhje."
Agron Shehaj deklaroi se SPAK ka treguar rezultate të pjesshme, por nuk ka kaluar ende “vijën e kuqe” që përfaqëson pushteti aktual. Sipas tij, reformat e SPAK nuk janë të mjaftueshme për të zgjidhur problemet politike të Shqipërisë, të cilat mbeten përgjegjësi e politikës.
"Ne tani presim që SPAK, me të drëjtë, të japë zgjidhje për të gjithë problemet e Shqipërisë. Është e pamohueshme, nuk themi dot që SPAK nuk ka bërë asgjë. Pjesërisht kanë vepruar, por është e vërtetë se duket sikur ka një vijë të kuqe, përtej të cilës duket sikur SPAK nuk kalon dot. Deri më sot ka treguar se nuk ka kaluar dot. Vija e kuqe është tek pushteti, Rama, Veliaj, Taulant Balla, etj, përveç atyre që u prishën me pushtetin."
Arlind Qori e konsideroi punën e SPAK si të pakryer, duke theksuar se ndryshimi mund të vijë vetëm nëpërmjet një shoqërie aktive që ushtron trysni mbi institucionet dhe qeverinë.
"Puna e SPAK dhe e institucioneve të drejtësisë, është një punë e pakryer, një punë e lënë në mes, e pakryer. Asnjë nuk mund të pretendojë se është kryer, korrupsioni dhe krimi i organizuar është vendosur me shpatullë për muri dhe shpëtuam. Nëse puna e SPAK do të kryhet ndonjëherë, këtë gjë nuk mund ta thotë askush."
