Kryetari i Partisë Demokratike, Sali Berisha, ka hedhur akuza të forta ndaj ish-ambasadorëve Donald Lu dhe Romana Vlahutin, duke i quajtur ata diplomatët më të korruptuar në historinë e diplomacisë botërore. Gjatë një konference për shtyp, Berisha i akuzoi ata për mashtrim në procesin e vetingut dhe për dështimin në garantimin e një sistemi të drejtësisë funksionale në Shqipëri.
“Garancitë absolute për vetingun kanë qenë rishqyrtimi i dosjeve kriminale, por ato u hodhën poshtë. Donald Lu dhe Romana Vlahutin e bazuan procesin në një mashtrim,” deklaroi Berisha.
Ai rrëfeu një bisedë me dy ish-ambasadorët, të zhvilluar gjatë kohës kur ishte në zyrën e tij, ku ata kishin garantuar burime të kualifikuara për shqyrtimin e dosjeve të gjykatësve dhe prokurorëve. “Më thanë se kanë njerëz të kualifikuar, madje edhe nga radhët e atyre në pension. Ky ishte mashtrimi ku u mbështet gjithë procesi,” u shpreh kreu i PD.
Ndoshta këto që thotë kryetari i PD janë të vërteta, edhe pse bisedat me ambasadorë janë normalisht konfidenciale. Megjithatë, gazetarët në konferencën e sotme për shtyp ndoshta harruan ta pyesnin zotin Berisha se kur u ndërgjegjësua për këto manipulime ambasadorësh. Sepse ai vetë ishte një nga 140 deputetët që votoi reformën në drejtësi. Nëse paska qenë kaq e rrezikshme, përse nuk e bojkotoi kryetari i PD votimin e kësaj reforme?
