Një makinë është gjetur e djegur në Grudë, disa minuta pas atentatit në Shkodër, 7 kilometra larg vendit të ngjarjes. Mjeti i djegur është një Land Rover dhe brenda tij janë gjetur dy armë zjarri.
Gjithashtu bëhet e ditur se një kamera sigurie mund të ketë regjistruar atentatin.
Kujtojmë se nga një atentat sot në Dobraç të Shkodrës, ka mbetur i vdekur Hamza Lici dhe u plagos Arlind Bushati.
Ndërsa, ka mbetur e vdekur edhe kalimtarja e rastit Flutura Basha, ndërsa u plagos bashkëshorti i saj Bashkim Basha.
Njoftimi i policisë:
Në vijim të informacionit të dhënë më parë për ngjarjen e ndodhur në aksin rrugor “Shkodër-Koplik”, në Dobraç, ju informojmë se:
Nga kontrolli i ushtruar në automjetin që udhëtonin shtetasit H. L., dhe A. B., u gjetën 3 armë zjarri (pistoleta).
Ndërkohë shërbimet e Policisë gjatë kontrollit të zonës për kapjen e autorëve, në fshatin Golem kanë konstatuar të djegur plotësisht një automjet tip “Range Rover” dhe 2 armë zjarri automatike.
Grupi i posaçëm hetimor në drejtimin e Prokurorisë së Shkodrës, po vijon punën për zbardhjen e rrethanave, sigurimin e provave me qëllim dokumentimin ligjor të ngjarjes, identifikimin dhe kapjen e autorëve.
