Arben Ahmetaj mund të jetë vërtet i kërkuar nga organet e drejtësisë, por arratisja në Zvicër duket se i ka dhënë një lloj qetësie. Aq sa, ish-zëvendëskryeministri ndjek edhe programet televizive në Shqipëri, ku jo rrallëherë ai është në qendër të debateve. Kështu ka ndodhur edhe mbrëmë, kur gjatë një emisioni në Euronews, Arben Ahmetaj ka reaguar duke i dërguar një mesazh drejtueses së emisionit për t’i shpjeguar se ai do të vijë një ditë në Shqipëri, por jo për t’u përgjigjur në SPAK. Ky reagim i zotit Ahmetaj erdhi pasi një nga të ftuarit deklaroi se ish-zëvendëskryeministri do të kthehet për të dëshmuar në SPAK.
Në fakt, këto ‘cic-mice’ të të akuzuarve nga drejtësia për korrupsion nga arratia po shndërrohen në normale. Aq sa, në intervistat e fundit të Arben Ahmetajt nuk kanë munguar momentet kur mund të na vinte keq për kushtet e vështira të jetesës në arratinë e Gjenevës për të, pasi në banesën aktuale të tij nuk kishte as kondicioner.
