Atentat mafioz në Shkodër. Dy të vrarë dhe dy të plagosur rëndë është bilanci i ngjarjes së rëndë të ndodhur në lagjen ‘Dobraç’. Hamza Lici, vëllai i Ibrahim Licit, kundërshtar i përbetuar i grupit kriminal Bajri, ka mbetur i vrarë në vendin e ngjarjes nga breshëria e plumbave të kallashnikovit. Viktima e dytë, sipas policisë, është një grua e identifikuar si Flutura Basha, e cila po kalonte rastësisht me motor me bashkëshortin e saj, i cili po ashtu ka mbetur i plagosur rëndë dhe ndodhet në spital.
Sipas informacioneve paraprake, Hamza Lici ka qenë duke udhëtuar me automjet S Class me targa kroate bashkë me Arlind Bushatin, kur i kanë zënë pritë. Pasi i kanë qëlluar me breshëri plumbash, automjeti ka dalë dhe ka përplasur motorin ku ndodhej gruaja që ka humbur jetën.
Arlind Bushati, djali i Xhemal Bushatit, kandidat për kryetar i Bashkisë së Shkodrës në zgjedhjet e pjesshme vendore të vitit 2022, është i plagosuri i dytë. Gjendja e tij shëndetësore është shumë e rëndë. Arlind Bushati denoncoi pak ditë më parë se ishte kërcënuar me jetë nga persona që lëviznin me motor. Pavarësisht denoncimit, askush nuk mori masa.
Ngjarja e rëndë duket se rikthen edhe njëherë përplasjet në Shkodër, mes Licëve dhe Bajrave. Nga konflikti mes këtyre dy grupeve në Dobraç dhe Kir janë shkaktuar shumë të vrarë e dhjetëra të plagosur, ndërsa të tjerë persona janë zhdukur pa gjurmë.
