Gjykata e Vlorës ka vendosur masën e sigurisë “arrest me burg” për babain e vajzës 17-vjeçare që tentoi vetëvrasjen disa ditë më parë në qytetin bregdetar. Vendimi u dha nga gjyqtari Bevil Beqiraj, i cili pranoi kërkesën e Prokurorisë për masë të rëndë sigurie, me arsyetimin se ekziston rreziku i prishjes së provave dhe i përsëritjes së veprës penale.
43 vjeçari akuzohet për veprat penale “Dhuna në familje” dhe “Shkaktimi i vetëvrasjes”. Gjatë seancës gjyqësore, mbrojtja kërkoi një masë më të butë sigurie, por kërkesa u refuzua.
Ngjarja e rëndë ndodhi më 14 korrik 2025, në lagjen “Kushtrimi” të Vlorës, ku 17-vjeçarja qëlloi veten me armë zjarri në banesën e gjyshit të saj, duke pësuar plagë të rënda në kokë. Ajo u transportua menjëherë në Spitalin e Traumës në Tiranë, ku vijon të jetë në gjendje të rëndë nën kujdesin intensiv të mjekëve.
Në vijim të hetimeve, policia ka bërë të mundur edhe gjetjen dhe sekuestrimin e armës së zjarrit që dyshohet se u përdor në ngjarje. Pistoleta është gjetur e fshehur brenda një qeseje plastike, në një vend grumbullimi materialesh pranë banesës së gjyshërve të të miturës. Arma është sekuestruar në cilësinë e provës materiale dhe do t’i nënshtrohet ekspertizës së plotë në Institutin e Policisë Shkencore, me qëllim dokumentimin e detajuar të rrethanave të ngjarjes.
Në këtë procedim penal është përfshirë edhe gjyshi i vajzës, ndërsa hetimet e policisë së Vlorës vijojnë për zbardhjen e plotë të rastit dhe identifikimin e përgjegjësve të tjerë të mundshëm.
