Kreu i Lëvizjes Bashkë, Arlind Qori, ka shpjeguar detajet e sloganit të preferuar “Shqipëri e Re”, që është kthyer në thirrjen qendrore të protestave që po zhvillohen në Tiranë, ku ai ka qenë ndër figurat kryesore të artikulimit të mesazheve të lëvizjes. Sipas tij, ky nuk është vetëm një slogan, por një frymë e re shoqërore dhe politike që po merr formë në rrugë.
Qori shprehet se “Shqipëria e Re” po lind si realitet i ri shoqëror dhe politik. Ai e përshkruan atë si një vend ku dinjiteti kombëtar nuk vihet në diskutim dhe ku marrëdhënia mes qytetarit dhe shtetit ndryshon thelbësisht, duke synuar një ekuilibër ku shteti i nënshtrohet kontrollit qytetar.
Sipas tij, në këtë vizion të ri, demokracia nuk mbetet vetëm një koncept formal, por bëhet bazë e zhvillimit të qytetarëve, ndërsa pasuritë natyrore dhe ato nëntokësore i përkasin publikut dhe jo interesave të ngushta. Po ashtu, theksohet një model ekonomik që shmang monopolet dhe oligarkinë, duke i hapur rrugë konkurrencës dhe iniciativës së lirë.
Në këtë platformë, rëndësi i jepet edhe mbrojtjes së mjedisit, me theks se natyra, plazhet, malet dhe lumenjtë duhet të trajtohen si pasuri të përbashkëta. Në arsim dhe shëndetësi, synimi i artikuluar është një sistem që formon profesionistë dhe garanton trajtim dinjitoz pa barriera financiare.
Gjithashtu, ai thekson nevojën për një administratë të bazuar në meritë dhe etikë, media të pavarura nga interesat oligarkike, si dhe një kulturë publike që nxit mendimin kritik dhe organizimin sindikal të punëtorëve.
