Një nga organizatorët e protestave qytetare, Andi Tepelena, ka hedhur poshtë idenë e artikuluar ditët e fundit nga disa pjesëmarrës dhe mbështetës të lëvizjes se fryma e krijuar në shesh mund të shndërrohet në një parti të re politike.
Në një reagim në rrjetet sociale, Tepelena thekson se njerëzit e angazhuar me mbarëvajtjen e protestave “nuk do të shfrytëzojnë energjinë popullore për të krijuar parti politike”, duke shtuar se kauza kryesore mbetet largimi i Edi Ramës nga Kryeministria.
Sipas tij, lëvizja është në thelb antisistem dhe synon që largimi i Ramës të sjellë një “efekt domino” që do të çonte edhe në largimin e kastës politike 35-vjeçare, me përfaqësuesit kryesorë Edi Rama dhe Sali Berisha. Tepelena shton se mënyra se si do të ndërtohet e ardhmja politike duhet të vendoset nga sovrani përmes zgjedhjeve të drejta dhe të barabarta, me qeveri teknike dhe kandidatë “atdhetarë e anti-mafia”.
Deklarata e tij vjen në një moment kur brenda protestës janë shfaqur edhe zëra që kanë propozuar kthimin e lëvizjes qytetare në një subjekt të ri politik.
