Me vendim qeverie po jepen 530 kredi me interes 0% për punonjësit e administratës publike. Ky vendim vjen në një vit elektoral, me një afat aplikimi që përkon me periudhën parazgjedhore.
Kjo ngre dyshime mbi motivet e vërteta të qeverisë, duke e bërë të duket më shumë si një strategji për të fituar vota sesa një politikë afatgjatë për strehimin.
Diaspora për Shqipërinë e Lirë e ka denoncuar këtë nismë e cila edhe sipas ligjit shqiptar ndalon dhënien e incentivave të tilla tre muaj para zgjedhjeve, duke e bërë këtë vendim potencialisht të paligjshëm dhe të rrezikshëm për vetë qeverinë.
Sipas deklaratës deri më tani, sistemi i pikëzimit për përfituesit nuk është i qartë, duke ngritur shqetësime për një mundësi të favorizimit të grupeve të caktuara.
Edhe pse kredia ofrohet me 0% interes, ka kosto shtesë si pagesa fillestare prej 20%, komisione administrative dhe rreziku i kthimit të kredisë në një kredi tregtare nëse përfituesi largohet nga administrata. Kjo mund ta bëjë më të shtrenjtë këtë "ndihmë" sesa duket fillimisht.
Sakaq, me çmimet e larta të banesave, veçanërisht në Tiranë, një kredi e tillë nuk garanton domosdoshmërisht akses të lehtë në blerjen e një shtëpie.
