Me urdhër të Prokurorisë së Tiranës është arrestuar një i dyshuar lidhur me rastin e zhdukjes pa gjurmë të Eglant Kocit, më 4 qershor në Tiranë.
Burimet konfirmojnë se Enea Zyferi dyshohet për përkrahje të autorit të krimit, pasi ka pasur kontakte me personin që dyshohet se ka zhdukur Kocin. Nga hetimet rezulton se Eglant Koci u zhduk pa gjurmë te Sheshi Wilson në Tiranë dhe pak ditë më vonë, në zonën e 5 Majit, u gjet motori i tij.
Prokuroria po heton për momentin për akuzën e rrëmbimit të personit, pasi pavarësisht kërkimeve, deri në këto momente ai nuk është gjendur.
Koci punonte si postier midis disa pikave të këmbimit valutor për kriptomonedhat dhe ky dyshohet të jetë edhe motivi i rrëmbimit të tij.
