Një operacion i gjerë i Policisë së Shtetit është zhvilluar gjatë natës në zonën e fshatrave të Lumit të Vlorës, ku janë ushtruar kontrolle në disa pika të ndryshme. Si rezultat i aksionit janë arrestuar disa persona dhe janë sekuestruar katër armë zjarri, si edhe një mjet i blinduar.
Mes të ndaluarve është 55-vjeçari Turi Aligjoni, i dyshuar si autor i plagosjes me armë zjarri të 27-vjeçarit Kevi Lazaj, ngjarje e ndodhur dy ditë më parë në lagjen Çole të Vlorës.
Në pranga ka rënë edhe Ilir Dula, i njohur edhe me emrat Aleksandër Dula dhe Aleksandër Thomai, i shpallur në kërkim ndërkombëtar nga autoritetet italiane. Sipas të dhënave, ai është dënuar në vitin 2024 nga Gjykata e Apelit e Leçes me 6 vjet e 8 muaj burg për trafikim të lëndëve narkotike dhe pjesëmarrje në organizatë kriminale me qëllim trafikimin e drogës.
Policia pritet të japë detaje të tjera zyrtare mbi operacionin dhe personat e arrestuar, ndërsa hetimet vijojnë.
