Fatime Kryemadhi, nëna e ish-deputetes Monika Kryemadhi, u paraqit këtë të hënë në seancën e radhës në GJKKO, në kuadër të procesit gjyqësor ku janë të përfshirë edhe Ema Çoku dhe Piro Xhixha.
Megjithatë, seanca u shty për një datë tjetër për shkak të mungesës së dy avokatëve mbrojtës të Piro Xhixhës, të cilët ndodheshin në një proces tjetër gjyqësor, ku po përfaqësojnë Jamarbër Malltezin.
Në një prononcim për mediat, Fatime Kryemadhi deklaroi se dëshironte të ishte e pranishme për të dëgjuar personalisht zhvillimin e seancës, duke ngritur pretendime lidhur me hetimet financiare ndaj saj.
"Desha ta dëgjoj vetë, sepse këta nuk kanë bërë asnjë ekspertizë për të ardhurat e mia", u shpreh ajo.
