Presidenti i Serbisë, Aleksandar Vuçiç, ka deklaruar se nuk beson te drejtësia e Hagës, ndërsa ka pretenduar se vendimi i pritshëm ndaj ish-presidentit të Kosovës, Hashim Thaçi, do të jetë i tillë që mund t'i hapë rrugë lirimit të tij.
Gjatë një vizite në Oseçinë, Vuçiç tha se Serbia ende nuk ka marrë informacion zyrtar nga Haga lidhur me vdekjen e Ratko Mlladiçit, ndërsa akuzoi vendet perëndimore se po përpiqen, sipas tij, të krijojnë perceptimin se serbët janë përgjegjës për gjithçka që ka ndodhur gjatë konflikteve në ish-Jugosllavi.
“Na presin ditë të vështira. Të gjithë ata që kanë marrë pjesë në krime kundër serbëve, gjithmonë i kanë liruar”, deklaroi Vuçiç, duke përmendur Ante Gotovinën dhe Naser Oriçin.
Presidenti serb u ndal veçanërisht te procesi ndaj Hashim Thaçit, duke pretenduar se vendimi pritet më 16 shtator dhe se koha e kaluar në paraburgim mund t'i llogaritet në dënim.
“Do të jetë i tillë që do t'i llogariten ditët e kaluara në paraburgim dhe, në thelb, ai do të lirohet”, pretendoi Vuçiç, pa paraqitur prova për parashikimin e tij.
Duke folur për Ratko Mlladiçin, Vuçiç deklaroi se vendi ku do të varroset ish-komandanti serb do të përcaktohet vetëm nga familja e tij.
Ai pretendoi gjithashtu se zhvillimet e fundit janë pjesë e një fushate më të gjerë që synon të shtojë presionin ndaj Serbisë në të ardhmen.
Vuçiç e lidhi këtë pretendim edhe me datën e vendimit që, sipas tij, pritet ndaj Thaçit, duke theksuar se 15 shtatori shënon Ditën e Unitetit Serb, ndërsa vendimi është parashikuar një ditë më pas.
“E di mirë dhe do të doja shumë të gaboja: do të ketë diçka dënuese, por jo për tragjedinë dhe viktimat serbe”, përfundoi Vuçiç.
