Një ngjarje tragjike ka tronditur qytetin turistik të Budvës, në Mal të Zi, ku një 65-vjeçar ka qëlluar për vdekje vëllain dhe nipin e tij. Vrasja e dyfishtë ndodhi rreth orës 08:00 në një bar buzë plazhit Slovenska, një nga zonat më të frekuentuara të qytetit.
Sipas njoftimit zyrtar nga policia e Malit të Zi, i dyshuari, identifikuar me inicialet S.S., është arrestuar menjëherë në vendngjarje. Forcat policore sekuestruan armën e zjarrit me të cilën u krye krimi dhe konfirmuan se vrasja ndodhi në një zonë publike, përballë dëshmitarëve të shumtë.
Mediat lokale raportojnë se motivi i krimit ka qenë një konflikt i vjetër familjar, i cili kishte të bënte me konkurrencën në biznesin e transportit turistik me anije në plazhin e Budvës. Viktimat dhe autori merreshin prej vitesh me këtë aktivitet, ndërsa përplasjet mes tyre kishin qenë të shpeshta. Mësohet se shkaku i menjëhershëm i debatit fatal lidhej pikërisht me menaxhimin dhe ndarjen e linjave të transportit të turistëve me barka dhe anije turistike.
“Rreth orës 8 të mëngjesit, nga Shërbimi i Gjatë i Drejtorisë së Sigurisë në Budva u pranua njoftim për përdorim të armës zjarri në rrugën Slovenska obala. Punonjësit e policisë reaguan menjëherë, gjetën të dyshuarin S.S. në vendngjarje, sekuestruan armën dhe e arrestuan”, thuhet në deklaratën zyrtare të policisë malazeze.
Autoritetet janë duke vijuar hetimet për të dokumentuar plotësisht rrethanat e krimit.
