Drejtori i Policisë së Kosovës, Gazmend Hoxha,ka pranuar dorëheqjen e kreut të Policisë për rajonin e Lipjanit, Argjend Gashi. Vendimi për largim vjen pas polemikave të mëdha që ka shkaktuar vdekja e 27-vjeçarit Agon Zejnullahu gjatë ndalimit nga forcat e rendit.
“Gashi ka paraqitur një kërkesë për lirimin nga detyra dhe ajo i është aprovuar,” deklaroi Hoxha për mediat.
Pesë zyrtarë të Policisë së Kosovës të përfshirë në ndalimin e Zejnullahut janë dërguar në paraburgim për një muaj. Ata përballen me akuzën e mundshme për “vrasje nga pakujdesia”.
Ngjarja ka tronditur opinionin publik pas publikimit të pamjeve në rrjetet sociale, ku viktima shihet i shtrirë dhe i lidhur në tokë, ndërsa një polic i mban gjurin mbi qafë.
Sipas Policisë, i riu dyshohej se ndodhej nën efektin e alkoolit dhe ishte ndaluar pasi kishte sulmuar automjete dhe kalimtarë.
Avokatët mbrojtës të efektivëve deklaruan pas seancës dëgjimore se nuk besojnë që policët e pezulluar kanë kontribuar apo shkaktuar vdekjen e 27-vjeçarit.
Ngjarja ka nxitur reagime të forta nga autoritetet më të larta të vendit. Presidentja Vjosa Osmani, kryeministri në detyrë Albin Kurti dhe ministri i Brendshëm në detyrë Xhelal Sveçla kanë kërkuar hetime të plota dhe transparencë mbi rastin.
Ndërkohë, familjarët e viktimës janë shprehur të zhgënjyer me mungesën e informacionit nga autoritetet. Vëllai i Zejnullahut tha për disa media në Prishtinë se të afërmit nuk kanë marrë asnjë sqarim zyrtar, ndërsa sipas tij, trupi i të ndjerit ka pasur “shumë shenja mavijosjeje dhe thyerje.”
