Ish-emisari i posaçëm i SHBA-së për dialogun Kosovë–Serbi, Richard Grenell, ka reaguar ashpër ndaj deklaratave të Presidentes së Kosovës, Vjosa Osmani, e cila tha se Donald Trump ka parandaluar një konflikt të ri mes Kosovës dhe Serbisë “gjatë javëve të fundit.”
Në një postim në rrjetin social “X”, Grenell i cilësoi këto deklarata si manipulim të fjalëve të Trump. “Turp për Vjosa Osmanin që manipuloi fjalët e Presidentit Donald Trump,” shkroi ai, duke theksuar se Trump i ishte referuar angazhimeve të viteve 2019–2020 dhe Marrëveshjes së Uashingtonit, jo ndonjë zhvillimi të ri.
“Donald Trump u nominua për Çmimin Nobel për Paqen për punën e tij në paqen dhe normalizimin ekonomik midis Kosovës dhe Serbisë. Osmani nuk ishte pjesë e asaj marrëveshjeje. Dhe të pretendosh sikur kishte diçka të re është absurde,” shtoi Grenell.
Në lidhje me këtë reagim të Grenell, Osmani do të mbajë një konferencë për media sapo të kthehet në Kosovë, sipas këshilltarit për media të presidentes.
