Qeveria portugeze ka reaguar lidhur me vrasjen e turistit 20-vjeçar në Ksamil, duke bërë të ditur se po ndjek nga afër rastin dhe është në kontakt me autoritetet shqiptare.
Raquel Trindade, përfaqësuese e zyrës së Ministrit të Punëve të Jashtme të Portugalisë, deklaroi se deri më tani autoritetet portugeze nuk kanë marrë informacion zyrtar mbi rrethanat e ngjarjes apo mbi hetimet që po zhvillohen në Shqipëri.
“Ministria e Punëve të Jashtme po ndjek rastin e këtij shtetasi portugez që humbi jetën në Shqipëri dhe, nëpërmjet ambasadës sonë në Romë, si dhe konsullatës së nderit në Tiranë, po bashkëpunojmë me autoritetet lokale”, deklaroi Trindade për median portugeze “Renascença”.
Ajo theksoi se, për momentin, autoritetet portugeze ende nuk kanë një informacion të plotë dhe zyrtar mbi atë që ka ndodhur.
“Dimë nga mediat lokale se ka pasur arrestime, por për momentin ende nuk kemi informacion përmes rrjetit tonë”, shtoi Trindade.
Përfaqësuesja e Ministrisë së Punëve të Jashtme siguroi se institucionet portugeze do të vazhdojnë ta ndjekin çështjen, si në komunikim me autoritetet shqiptare, ashtu edhe në raport me familjarët e viktimës.
Turisti portugez, 20 vjeç, humbi jetën në Ksamil pasi dyshohet se u godit me thikë gjatë një konflikti. Autoritetet shqiptare po vijojnë hetimet për zbardhjen e plotë të rrethanave të ngjarjes.
