SPAK shpalli pretencën për gjashtë të pandehurit, përfshirë edhe Leonard Dukën, i cilësuar si kreu i klanit kriminal Duka, të cilët akuzohen për ekzekutimin e ish-policit Santjago Malko. Prokurori i Posaçëm, Behar Dibra, kërkoi dënimin me 32 vite burgim për Leonard Dukën dhe 32 vite burg për Fatmir Hysenin, i njohur si Docja, i cili veproi si ekzekutor. Për Erlis Dukën, vëllai i Leonard Dukës, u kërkua dënimi me 25 vjet burgim; për Aleksandër Manxhakun, 22 vite burgim; ndërsa për Oltjon Logun dhe Dritan Agën u kërkua dënimi me nga 23 vite burgim secili.
Të pandehurit akuzohen për “vrasje me paramendim”, “armëmbajtje pa leje”, “trafik narkotikësh”, të kryera në kuadër të grupit kriminal.
Santiago Malko, ish-polic, njihej si krahu i djathtë i Ervis Martinajt, “mbreti i bixhozit” i zhdukur pa gjurmë. Përplasja mes vëllezërve Duka dhe Martinajt nisi pas pengmarrjes së babait të tyre, Muhamet Duka, dhe dhunës që u ushtrua ndaj tij. Dikur miq e më pas armiq të përbetuar, klani Duka, në pamundësi për të ekzekutuar Ervis Martinajn, vrau njeriun e tij të besuar, Santjago Malko. Për të njëjtën ngjarje janë gjykuar më herët Blendi Teta dhe Ilir Selmani.
