Zjarri që shpërtheu rreth dy javë më parë pranë liqenit të Luleve në Lurë ka marrë përmasa shqetësuese, duke u përhapur deri në zonën e Zall Gjoçajt. Flakët kanë përfshirë tashmë dhjetëra hektarë me pyje pishash të zeza, ahu dhe bimësi të tjera karakteristike të zonës.
Megjithëse dhjetëra efektivë të ADZM Dibër, Shërbimit Zjarrfikës të Bashkisë Dibër, po punojnë nga toka për fikjen e zjarrit, situata mbetet e pakontrolluar.
Terreni i thyer malor dhe era e fortë kanë vështirësuar ndjeshëm përpjekjet për shuarjen e flakëve. Zjarri është zhvendosur tashmë drejt zonës së verimit në Zall Gjoçaj, ku rrezikon djegien e staneve të bagëtive, qindra koshereve të bletëve dhe pasurive të tjera të banorëve vendas.
Autoritetet lokale kanë kërkuar ndërhyrje emergjente nga ajri, pasi ndërhyrja tokësore është bërë e pamundur. Duke qenë se pranë ndodhen liqenet e Lurës dhe në afërsi edhe ato të malit të Balgjajt, ndërhyrja me helikopterë konsiderohet mënyra më efektive për të frenuar përhapjen e zjarrit dhe për të shmangur dëme të mëtejshme në Parkun Kombëtar “Lurë-Mali i Dejës”.
