Gjykata Themelore në Prishtinë ka vendosur të zgjasë masën e paraburgimit për Naim Murselin, Kushtrim Kokallën dhe Granit Plavën edhe për dy muaj të tjerë, për shkak të dyshimeve për vrasjen e Liridona Ademajt. Masa e paraburgimit për ta do të jetë në fuqi deri më 24 dhjetor 2024.
Fillimisht, më 3 dhjetor 2023, Gjykata e kishte vendosur që tre të dyshuarit të mbaheshin në paraburgim për 30 ditë, një vendim që më pas e konfirmoi edhe Gjykata e Apelit. Një i katërt, T.D., u arrestua më 9 dhjetor dhe iu caktua masa e paraburgimit më 11 dhjetor, nën dyshimin se kishte shitur armën dorasit. Megjithatë, T.D. arriti të fitojë lirinë, pasi Gjykata vendosi të ndërpresë masën e paraburgimit pas një ankese nga ai.
“Ju njoftojmë se me datë 24.10.2024 Gjykata Themelore në Prishtinë – Departamenti për Krime të Rënda ka aprovuar kërkesën e Prokurorisë Themelore në Prishtinë për vazhdimin e masës së paraburgimit, në çështjen penale ndaj të pandehurve N.M, G.P dhe K.K. Të pandehurve N.M, G.P dhe K.K iu është vazhduar masa e paraburgimit në kohëzgjatje prej (2) muaj për secilin, e cila masë do ju zgjasë deri me datë 24.12.2024”, deklaroi Mirlinda Gashi, zëdhënëse e Gjykatës Themelore në Prishtinë.
Motivet e vrasjes së Ademajt, e cila kishte nënshtetësi suedeze, mbeten ende të paqarta. Ajo jetonte me bashkëshortin dhe dy djemtë e saj.
