Kryeministri i Kosovës, Albin Kurti, ka shprehur shqetësime mbi marrëveshjen mes Italisë dhe Shqipërisë për ndërtimin e qendrave të emigrantëve në Gjadër. Në një intervistë për Euractiv, Kurti theksoi se ky model nuk përbën një zgjidhje të qëndrueshme dhe ngriti pyetje për respektimin e të drejtave të individëve të burgosur.
Ai vuri në dukje se ndërtimi i qendrave të riatdhesimit në Ballkanin Perëndimor rrezikon të dëmtojë të drejtat e njeriut dhe se është e nevojshme të sigurohet që këto të drejta të respektohen. “Si mund të sigurohemi që të drejtat e individëve të burgosur të respektohen në këto qendra?”, pyeti ai.
Kurti shprehu gjithashtu se, ndonëse një pranim i përkohshëm i emigrantëve mund të merret në konsideratë në situata urgjente, ai nuk është kundër idesë së përsëritjes së modelit italian, por theksoi rëndësinë e trajtimit të çdo qenieje njerëzore me kujdes.
Ndërkohë, kryetarja e Komisionit Europian, Ursula von der Leyen, e ka cilësuar marrëveshjen mes Shqipërisë dhe Italisë si një model të suksesshëm, duke inkurajuar vendet anëtare që ta përdorin si referencë për përballimin e krizës së emigrantëve.
