Ish-komandanti i UÇK-së për Zonën e Nerodimes, Shukri Buja, ka njoftuar se është nisur drejt Hagës pas një ftese nga Dhomat e Specializuara të Kosovës. Ai ka theksuar se ky udhëtim është bërë “pa dëshirën e tij” dhe në bazë të një “ftese të detyrueshme”.
Në një mesazh të shpërndarë në Facebook për bashkëluftëtarët, miqtë dhe qytetarët, Buja ka vlerësuar rëndësinë e UÇK-së dhe luftës çlirimtare të Kosovës, duke e cilësuar atë si “të shenjtë” dhe “të drejtë”.
Ai theksoi se “falë përpjekjeve të armatosura dhe përkrahjes së aleatëve, veçanërisht të SHBA-ve, ne sot e gëzojmë lirinë.” Buja nënvizoi se “UÇK-ja ishte kundër pushtuesit, një luftë e imponuar dhe e domosdoshme,” duke shtuar se “lufta çlirimtare solli lirinë dhe pavarësinë që sot shumë e gëzojnë, ndërsa bijtë më të mirë të këtij vendi akuzohen dhe mbahen padrejtësisht në burg.”
Ai e mbylli mesazhin me shpresë të madhe për pafajësinë e bashkëluftëtarëve, duke shprehur besimin se drejtësia do të triumfojë.
