Kryebashkiaku i Tiranës, Erion Veliaj, do të paraqitet sot në SPAK. Ende nuk dihet për çfarë do të pyetet, por burimet për mediat thonë se arsyet lidhen me dy dosjet famoze, e para ajo e inceneratorëve dhe e dyta dosja "5D", të cilat kanë kulmuar me arrestimin e njerëzve të të gjithë komandës drejtuese të Bashkisë Tiranë me rreth 9 drejtorë dhe disa zyrtarë të tjerë.
Pritet që SPAK-u të ketë veprime të tjera në lidhje me drejtorët dhe bashkëpunëtorët e Veliajt, të cilët po hetohen për çështjen e inceneratorëve. Gjithashtu janë thelluar edhe më tej hetimet për dosjen "5D".
Gjithashtu Erion Veliaj ka qenë i thirrur për t’u paraqitur në SPAK edhe para disa javësh, por arsyet shëndetësore, siç ishte operacioni i tëmthit pas arrestimit të drejtorëve, ka bërë që Veliajt t'i shtyhen paraqitjet. Një fletë e dytë thirrjeje ka shkuar te kryebashkiaku, duke i caktuar afatin për t’u paraqitur dhe për t’u pyetur nga SPAK-u.
Prokurorët e SPAK-ut mesa duket kanë mundur të sigurojnë fakte dhe prova, të cilat implikojnë edhe kryebashkiakun, Erion Veliaj, në çështjen e inceneratorëve dhe të dosjes "5D", jo vetëm për faktin se ai ka qenë një person në dijeni të gjithçkaje ç’ka ndodhur, por dyshohet edhe për veprën e "shpërdorimit të detyrës" dhe "korrupsionit".
Veliaj prej disa vitesh ka qenë një nga “avokatët” kryesorë të aferës së inceneratorëve. Ai e mbronte me pathos dhe deklaronte se ishte një investim i suksesshëm, si dhe ka detyruar drejtorët e tij të firmosin një kontratë shtesë mbi kontratën koncesionare të inceneratorëve, siç është ajo e dherave, e cila ka kapur vlerën marramendëse.
Deri tani SPAK-u mesa duket ka mundur të sigurojë informacione zyrtare se këto fonde janë përdorur në mënyrë abuzive.
