Një film i vogël animacioni në Kinë po dëshmon se edhe kritikat negative mund të kthehen në reklamën më të mirë.
Filmi “Niu Lai” pati një fillim katastrofik në kinema. Gjatë dhjetë ditëve të para të shfaqjes, ai grumbulloi vetëm rreth 1,480 dollarë nga shitja e biletave.
Personazhet dhe stili i pazakontë i animacionit u kthyen shpejt në objekt talljeje në rrjetet sociale kineze.
Përdoruesit nisën të shpërndanin fotografi dhe video nga filmi, ndërsa komentet negative shtoheshin.
Por ndodhi pikërisht e kundërta e asaj që mund të pritej.
Kurioziteti i krijuar nga kritikat bëri që gjithnjë e më shumë njerëz të shkonin në kinema vetëm për të parë filmin për të cilin po fliste interneti.
Të hënën, “Niu Lai” arriti të siguronte rreth 1.2 milionë dollarë të ardhura vetëm brenda një dite, ndërsa të ardhurat totale u ngjitën në rreth 2.5 milionë dollarë.
Sipas raportimeve të mediave kineze të cituara nga AP, projekti është edhe më i pazakontë sepse pretendohet se filmi është realizuar gjatë pesë viteve nga vetëm dy persona: regjisori dhe nëna e tij. Associated Press thekson se nuk e ka verifikuar në mënyrë të pavarur këtë detaj.
Historia e “Niu Lai” është kthyer kështu në një shembull të fuqisë së rrjeteve sociale: një film që pothuajse askush nuk po e shihte u kthye në fenomen pikërisht sepse njerëzit nisën të diskutonin se sa i keq ishte.
