Opozita iu rikthye kuvendit dhe normalitetit të jetës parlamentare me justifikimin se do merreshin seriozisht me buxhetin dhe seancat e debatit për të. Në ditën e dytë të seancës për këtë temë PD kishte lajmëruar dhe një protestë para dyerve të kuvendit për të kundërshtuar buxhetin. Përveç numrit modest të pjesëmarrësve, ajo që ra në sy ishte mungesa e deputetëve demokratë që kishin thirrur këtë protestë.
Kryetari i grupit parlamentar, Gazment Bardhi, vijonte të ishte në sallë bashkë me deputetët e tjerë, ndërkohë që protestuesit, një pas një, u mblodhën dhe u larguan nën shi pa pasur asnjë mbështetje nga salla. Deputetët vijonin fjalimet e mërzitshme dhe Gazment Bardhi shqetësohej nga biseda e ministrave duke u kërkuar atyre të mos bisedonin.
Mesa duket, zoti Bardhi nuk e fshehu dot nervozizmin që, në të njëjtën kohë kur kishte një protestë para kuvendit, Sali Berisha vijonte takimin e përnatshëm poshtë ballkonit të shtëpisë, duke lënë jashtë vëmendjes gjithë aksionin politik të PD-së në parlament dhe jashtë tij.
Ky ç’organizimi i organizuar i opozitës, në një ditë të rëndësishme parlamentare, mesa duket ka sjellë nervozizëm tek ata që mendojnë se drejtojnë politikën e PD-së, me një pjesë të deputetëve në një sallë të ngrohtë parlamenti, ndërkohë që drejtuesi i vërtetë e ka të qartë: aksioni i vetëm mbetet ai për lirimin e tij.
