Deputeti i LZHK-së, Dashamir Shehi, ka propozuar sot në Kuvend rritjen e fondit për kompensimin e pronarëve dhe ish-të përndjekurve politikë, duke kërkuar 3-fishimin e buxhetit për vitin 2025.
Gjatë fjalës së tij nga foltorja e Kuvendit, Shehi e cilësoi shumën prej 30 milionë eurosh për kompensimin e pronave si të pamjaftueshme. Sipas tij, sistemi burokratik aktual dhe proceset gjyqësore pengojnë zbatimin e këtij kompensimi.
Ai kërkoi që buxheti për kompensimin e pronarëve dhe për ish-të përndjekurit politikë të rritet minimalisht 2-3 herë, duke shtuar se këto çështje duhet të mbyllen sa më shpejt për të mundësuar integrimin e Shqipërisë në Bashkimin Europian.
“E dyta keni vënë për pronat 30 milionë. Por me atë sistem burokratik që keni vënë ju, me atë gjykatë, sigurisht që aq do mbeten ato. Unë them që minimalisht buxheti për konpensimin e pronave të rritet 2-3 fish. Kjo edhe buxheti për ish-të përndjekurve. Këto histori duhet të mbyllen, për një shtet që pretendon të hyjë në Europë”, tha Shehi.
