Sot në Kuvend ka nisur diskutimi për projektbuxhetin e vitit 2025, ku Kryeministri Rama deklaroi se pensionistët me pensione deri në 200 euro në muaj do të përfitojnë një bonus prej 150 eurosh në fundvit, ndërsa ata me pensione më të larta do të marrin 100 mijë lekë të vjetra (rreth 100 euro).
“Do të çlirojmë një fond prej afër 1 miliard eurosh për shpërblimet e fundvitit. Pensionistët me pensione deri në 20 mijë lekë do të marrin trefishin e bonusit të mëparshëm, ndërsa ata me pensione më të larta do të marrin dyfishin,” tha Rama. Ai sqaroi se dallimi bëhet për të ndihmuar më shumë ata me pensione më të ulëta.
Tension mes deputetëve dhe ndërprerje e seancës
Gjatë fjalës së Kryeministrit, deputetët e Partisë Demokratike u ngritën në këmbë dhe filluan të godasin tavolinat, duke shprehur pakënaqësi. Rama u përpoq të qetësonte situatën, por pas refuzimit të deputetëve për t’u ulur, i kërkoi Kryetares së Kuvendit, Elisa Spiropali, një ndërprerje 5-minutëshe, e cila u miratua.
Demokratët kërkonin përgjigje për çështjen e dëmshpërblimit të Bechettit, me kreun e grupit parlamentar, Gazment Bardhi, që pyeti me zë të lartë: “Ku janë paratë e Bechetit?”.
Rama e cilësoi sjelljen e opozitës si të papranueshme dhe theksoi se duhet të sanksionohet me votim për të ruajtur rendin dhe disiplinën në Kuvend. “Parlamenti është vendi ku secili mbron pozicionin e vet, jo për të ulëritur dhe ndërprerë fjalën e të tjerëve,” përfundoi Kryeministri.
