Kryetari i Partisë Demokratike, Sali Berisha, zhvilloi një takim online me shqiptarët në Londër. Takimi, i planifikuar të niste në orën 13, u shty me tre orë për shkak të problemeve teknike me lidhjen e internetit.
Përpjekjet e Berishës për të zhvilluar fushatë live me shqiptarët dhe aktivistët e diasporës përmes Skype, veçanërisht në vendet që e kanë shpallur “Non Grata”, si SHBA dhe Britania e Madhe, reflektojnë vazhdimësinë e strategjisë së tij për të kapërcyer masat e marra ndaj tij nga këto vende.
Gjatë fjalës së tij, Berisha i bëri thirrje shqiptarëve, sidomos atyre që jetojnë jashtë vendit, të angazhohen në zgjedhjet e ardhshme për të mbështetur opozitën.
“Ju keni një mision: të luani një rol përcaktues në zgjedhjet e ardhshme, në fitoren e opozitës dhe në arkivimin e narkoshtetit. Po përballemi me një shtet që nuk njeh asnjë parim tjetër përveç vjedhjes dhe frikësimit të shqiptarëve. Kjo është një diktaturë, miqtë e mi. Shqipëria është sot vendi me më shumë të burgosur politikë se Bjellorusia dhe Rusia. Liderët kryesorë të opozitës janë të arrestuar. Së bashku, ne do t’i japim Edi Ramës përgjigjen që meriton,” – u shpreh Berisha.
Në takim mori pjesë edhe zëdhënësja e PD, Floriana Garo, e cila garantoi emigrantët se me ardhjen e Berishës në pushtet do të krijohen kushte që do t’i nxisin ata të kthehen në atdhe.
“Jam e bindur se një pjesë prej jush mendon të kthehet një ditë… një ditë kur Shqipëria të ofrojë shpresë dhe mundësi për një të ardhme më të mirë.
Rroga dhe pensione më të larta, një buxhet dyfish më të madh për shëndetësinë dhe arsimin, më shumë siguri për jetën dhe të ardhmen,” – deklaroi Garo ndër të tjera.
