Kryeministri Edi Rama u ka bërë thirrje emigrantëve shqiptarë që punojnë në sektorët e ndërtimit dhe turizmit jashtë vendit, veçanërisht në Greqi, të kthehen në Shqipëri. Në podkastin e tij “Flasim”, Rama tha se në Shqipëri ka një kërkesë të madhe për punonjës të kualifikuar në këto fusha dhe se pagat janë mjaft konkurruese.
“Është çmenduri të punosh në ndërtim në Greqi dhe të mos kthehesh kur këtu ka mundësi të mëdha,” deklaroi ai, duke njoftuar se qeveria po përgatitet të hapë një dritare për t’u ofruar emigrantëve kontrata konkrete pune në tregun shqiptar. Sipas Ramës, dritarja do të hapet në qytete si Athina, Milano dhe në Gjermani, për të promovuar ofertat e reja të punës.
Por a është paga prej 600 eurosh e mjaftueshme për të tërhequr këta punëtorë? Vetë Rama, vetëm një muaj më parë, e kishte pranuar se situata e pagave në ndërtim është problematike, duke deklaruar: “Të thuash që në ndërtim janë pagat 600 euro, kur sot problemi kryesor është ku të gjejnë punëtorët, qoftë në numër, por edhe për aftësi, është të tallesh me përbuzje me këtë hall kombëtar.
Flitet për një punë që kërkon përpjekje fizike të jashtëzakonshme dhe shpesh është e rrezikshme. Me çmimet në rritje dhe koston e jetesës që vazhdon të rritet, sa ia vlen kthimi në Shqipëri për të vazhduar të bëjnë të njëjtën punë të vështirë për një pagë që vështirë se mund të mbajë një familje.
