Pas fjalës së Kryeministrit Edi Rama, kreu i Grupit të PD-së, Gazment Bardhi, kërkoi ndërprerjen e seancës, duke theksuar se foltorja ishte bërë pis nga uji i derdhur nga Rama. Bardhi insistoi që salla të pastrohej foltorja se të vazhdonte fjalën e tij.
Pas rifillimit të seancës, Bardhi kritikoi premtimet e Kryeministrit për bonuset për pensionistët, duke i quajtur ato mashtrime elektorale. Rama premtoi dy bonuse në vit për pensionistët, por Bardhi theksoi se Kryeministri i ndan këto përfitime vetëm në prag të zgjedhjeve. “Njëherë në katër vjet Rama kujtohet për pensionistët, dhe gjithmonë për efekt elektoral,” tha ai.
Bardhi vuri në dukje se ndërsa vendet e tjera të rajonit ofrojnë rregullisht bonuse dhe përmirësime për pensionistët, qeveria shqiptare bën përjashtime vetëm kur afrohen zgjedhjet. Ai argumentoi se buxheti për vitin 2025 nuk parashikon bonus për fundvitin, duke akuzuar Kryeministrin se ndjek politika të menduara për të fituar vota dhe jo për të përmirësuar mirëqenien e shtresave në nevojë.
“Një Kryeministër i përgjegjshëm do të thoshte sa është fondi në buxhet për rritje të pensioneve. Por fondi është zero,” tha Bardhi. Ai përfundoi duke theksuar se qeveria duhet të marrë shembull nga vendet e tjera të rajonit, duke ndjekur politika të qëndrueshme e jo të improvizuara.
