Ish-presidenti Ilir Meta u përball këtë të martë me Gjykatën e Apelit të Posaçëm, duke kundërshtuar masën e sigurisë "arrest me burg". Ndërkohë, ish-bashkëshortja e tij, Monika Kryemadhi, ka apeluar masën e "detyrimit për paraqitje".
Për gati një orë, Meta, i cili po hetohet për korrupsion, pastrim parash dhe fshehje pasurie, ka dhënë sqarime mbi dyshimet e SPAK, duke pretenduar se akuzat janë të pabaza dhe politikisht të motivuara. Ai mohon përfshirjen në aferën CEZ-DIA apo në vepra të tjera penale, duke e cilësuar masën e arrestit si një përpjekje për të ndëshkuar kundërshtarët politikë të qeverisë së Edi Ramës.
Sipas Metës, SPAK po manipulon faktet për ta fajësuar me çdo kusht dhe për të justifikuar masën ekstreme të arrestit, duke i shërbyer, sipas tij, qëllimeve të kryeministrit për të dobësuar opozitën dhe shkatërruar pluralizmin politik në prag të zgjedhjeve.
Në lidhje me akuzat për fshehje të pasurisë, Meta theksoi se nuk mban përgjegjësi për deklarimin e pasurisë së familjarëve apo ish-bashkëshortes, Monika Kryemadhi, e cila, sipas tij, ka plotësuar vetë formularët e pasurisë. Ai shtoi se nuk ka marrë asnjë njoftim apo gjobë nga Tatimet apo ILDKPI për ndonjë shkelje. Meta u shpreh se si ish-president nuk e imagjinon arratisjen dhe, për të shmangur çdo dyshim, i kërkoi gjykatës bllokimin e pasaportës së tij. Ai kërkoi lirimin për të vijuar fushatën zgjedhore.
Nga ana tjetër, SPAK këmbëngul se ekzistojnë prova dhe rrethana që justifikojnë mbajtjen e Metës në paraburgim. Prokuroria pretendon se ka siguruar dëshmi për përfshirjen e tij në aferën CEZ-DIA, për ndikimin në favor të biznesmenëve në lidhje me kontrata dhe miratimin e ligjeve klienteliste, si dhe për kontrata me kompani lobuese në SHBA.
Të njëjtat akuza rëndojnë edhe mbi deputeten Monika Kryemadhi. Ndërkohë, edhe Piro Xhixha dhe Ema Çoku kanë apeluar vendimet e Gjykatës së Posaçme për çështjet e tyre përkatëse.
