Nesër Gjykata Kushtetuese pritet të marrë vendimin për masën e prokurorisë së posaçme për arrest shtëpie për Sali Berishën. Kryetari i Partisë Demokratike dhe dhëndri i tij kanë dërguar në Gjykatën Kushtetuese për gjykim masën ndaj tyre, pasi Gjykata e Posaçme dhe ajo e Lartë lanë në fuqi vendimin e prokurorëve të SPAK.
Jo rastësisht nesër kryetari i PD ka ftuar qytetarët në një protestë kombëtare për buxhetin. Një temë për të cilën këto 33 vjet nuk është protestuar asnjëherë nga asnjë opozitë, veç debateve në parlament. Dhe jo krejt rastësisht Sali Berisha, që del së paku dy herë në ditë në konferencë dhe takim me mbështetësit, nuk e ka përmendur Gjykatën Kushtetuese dhe anëtarët e saj që nesër pritet të marrin vendim për çështjen ndaj tij dhe dhëndrit të tij.
A thua Sali Berisha është transformuar në politikanin që nuk ndërhyn në çështjet e drejtësisë? Pak e vështirë të besohet kjo, po të shohësh dhe ndjekësh telendisjen e përditshme që ai u bën prokurorëve të SPAK, gjykatësve të GJKKO dhe çdo institucioni të drejtësisë që nuk e ka nën kontroll. Njëjtë ka ndodhur javë më parë dhe me Gjykatën Kushtetuese dhe anëtarë të veçantë të saj, të cilët Berisha s’i ka kursyer kur janë emëruar si të tillë, por për çudi sot hesht.
“Amnistia” që Sali Berisha po u bën javët e fundit gjyqtarëve kushtetues nuk duket e rastësishme. Mekanizmat e tij për të vendosur nën kontroll institucionin që pritet të marrë një vendim të rëndësishëm janë prezente dhe aspak të pavlera. Përndryshe, vetë Gjykata Kushtetuese me vendimin e saj të nesërm do të vendosë në balancë punën e SPAK, një proces që nis me vendimin për Berishën dhe përfundon me vendimin e pritur për përgjimet e SKY ECC.
Vendimi i nesërm do të jetë një test për Gjykatën Kushtetuese për të treguar se edhe veprimet e kryetares së saj të sinkronizuara me Elisa Spiropalin, për të zgjatur në mënyrë të paligjshme mandatin e disa prej anëtarëve, nuk janë pjesë e një pazari politik mes PS dhe PD për të kontrolluar këtë gjykatë.
