Inspektorët e Autoritetit Kombëtar të Ushqimit (AKU) kanë marrë mostra nga tre lloje produktesh ushqimore që kanë konsumuar 70 fëmijë të kopshtit publik në Gramsh, të cilët u helmuan. Produktet nga të cilat u morën mostrat janë mishi i pulës, qumështi dhe vezët.
Mjekët dhe prindërit dyshojnë se helmimi ka ndodhur për shkak të salmonelës, një bakter i rrezikshëm që përhapet zakonisht përmes ushqimit të kontaminuar ose higjienës së dobët. Simptomat e fëmijëve përputhen me ato të helmimit nga salmonela.
Sipas dokumenteve zyrtare, kopshti ka një kontratë me një operator privat që përgatit dhe shpërndan ushqimin për fëmijët. Ky operator është konstatuar më parë nga AKU në vitin 2023 me shkelje të rregullave higjeno-sanitare, por megjithatë ka vijuar punën normalisht.
Pas incidentit, inspektorët e AKU zbuluan se në kuzhinën e kopshtit nuk kishte frigoriferë funksionalë për ruajtjen e produkteve të ndjeshme, si mishi dhe qumështi, çka përbën një problem serioz për sigurinë ushqimore.
