Prokuroria e Përgjithshme përditësoi të dhënat lidhur me kallëzimet, procedimet penale dhe arrestimet për veprat që prekin zgjedhjet e lira. Sipas prokurorisë deri më datë 22.05.2025, janë regjistruar 107 kallëzime penale që lidhen me krimet zgjedhore.
“Burim i njoftimit të veprave penale për kallëzimet e mësipërme kanë qenë, policia gjyqësore në 64 raste, SPAK në 17 raste, subjekte politike në 9 raste, kryesisht në 11 raste dhe shtetas në 6 raste”, theksoi prokuroria.
Konkretisht, në gjuhën e shifrave rezulton se 10 kallëzime janë referuar në Prokurorinë Fier, 5 në Prokurorinë Sarandë, 4 në Prokurorinë Durrës, 33 në Prokurorinë Tiranë, 3 në Prokurorinë Gjirokastër, 4 në Prokurorinë Kukës, 8 në Prokurorinë Lezhë, 17 në Prokurorinë Dibër, 2 në Prokurorinë Vlorë, 4 në Prokurorinë Korçë, 3 në Prokurorinë Shkodër, 12 në Prokurorinë Elbasan dhe 2 në Prokurorinë Berat.
Nga kallëzimet penale të regjistruara, është vendosur mosfillimi për 16 prej tyre. 8 nga Prokuroria Tiranë, 2 nga Prokuroria Kukës, 3 nga Prokuroria Dibër, 1 nga Prokuroria Sarandë, 1 nga Prokuroria Fier dhe 1 nga Prokuroria Elbasan.
Prokuroria njoftoi se janë arrestuar në flagrancë 7 persona, 4 në Prokurorinë Tiranë, 1 në Prokurorinë e Elbasanit, 1 në Prokurorinë Lezhë dhe 1 në Prokurorinë e Fierit, si dhe është dhënë urdhër ndalimi për 4 persona nga Prokuroria e Elbasanit. Kallëzimet e tjera rezultojnë të jenë në fazë verifikimi.
