Grupi kriminal i drejtuar nga Elvis Doçit, i njohur si "Visi i Pojës", ka përdorur sistemin joformal të transferimit të parave të njohur si “Hawala”, për të kryer pagesat për sasi të mëdha kokaine të blera në Ekuador. “Hawala” është një mënyrë informale transferimi, ku paraja nuk lëviz fizikisht, por këmbehet nëpërmjet rrjeteve të ndërmjetësve.
Në një rast konkret, Elvis Doçi – nipi i Xhevdet Troplinit, i njohur si “Poja” – ka bashkëpunuar me Juxhin Drazhin dhe Artan Sulejmanin për të kryer një transfertë prej 500 mijë dollarësh amerikanë si pagesë paraprake për blerjen e 500 kg kokaine nga Guayaquil, Ekuador. Kjo pagesë është realizuar më 24 shkurt 2021.
“Sipas dosjes, në nëntor 2020, përdoruesi i Sky ECC me PIN C3289B, i identifikuar si Elvis Doçi, fillon bisedat për krijimin e një grupi me pjesëmarrës përdoruesit JTD0FN (Artan Sulejmani) dhe 4VLUFS (Juxhin Drazhi), me synimin për të organizuar importimin e rreth 500 kg kokaine në Evropë përmes një kontejneri nga Ekuadori. Blerësit dyshohet të jenë përdoruesit e Sky ECC me PIN-et xxx dhe yyy, ndërsa përdoruesi i një PIN-i tjetër të koduar si ‘XXX’, me emrin e koduar ‘Nino’, ka marrë përsipër sigurimin e drogës, duke jetuar vetë në Amerikën e Jugut,” thuhet në dosje.
Në një nga komunikimet, Elvis Doçi i shkruan Artan Sulejmanit për transferimin e parave:
“…tani të dal direkt në temë, mos të lodh. Kam një mik që po ngarkon gjëra nga Ekuadori. Ka bërë disa punë këtë periudhë dhe është i interesuar edhe për aty në Valenca… me çanta nuk bëhet?”.
Pas arritjes së marrëveshjes për sasinë prej 500 kg kokainë, fillon organizimi i transferimit të parave.
“Menjëherë pas kësaj, përdoruesi 4VLUFS (Juxhin Drazhi) jep të kuptohet se lëvizjet e parave janë maskuar si transaksione fiktive për tregtinë e frutave: ‘Unë po e konfirmoj si punë, po i kaloj dhe lekët e frutave, edhe ju bëni planet tuaja që të kalojmë leket dhe ta bëjmë’”.
Pas shumë komunikimesh, më 24 shkurt 2021, Artan Sulejmani dyshohet se ka realizuar një transfertë prej 505,650 dollarësh amerikanë, të cilat janë dërguar drejt Amerikës së Jugut dhe janë marrë fizikisht nga “Nino” – që sipas hetimeve është Juxhin Drazhi.
Transferta është bërë përmes një agjencie këmbimi valutor në Vlorë. Në këtë episod dyshohet se është përfshirë edhe Nexhmedin Danaj, pronar i televizionit kabllor “Vlora Cable”, që tashmë është vendosur nën sekuestro.
“Nga analiza e bisedave dhe veprimeve të dokumentuara, SPAK vlerëson se ekziston një dyshim i arsyeshëm se Elvis Doçi, Artan Sulejmani dhe Juxhin Drazhi kanë vepruar në mënyrë të organizuar si një grup i strukturuar kriminal. Duke qenë se përmes sistemit bankar është e pamundur të lëvizet një shumë kaq e madhe parash, ata kanë përdorur sistemin ‘Hawala’ si një kanal alternativ për transferimin e shumës prej 505,650 dollarësh. Paratë janë tërhequr në Vlorë, në një agjenci private, duke shmangur detyrimet ligjore për deklarimin e burimit dhe pagesën e taksave. Dyshohet se këto para vijnë nga aktiviteti i paligjshëm i trafikut të lëndëve narkotike,” përfundon SPAK.
