Në një dokument zyrtar të Parlamentit grek të vitit 2013, i cili përmend personazhe të përfshira në grupe kriminale të lidhura me gjobvënie, vrasje, pastrim parash etj., përmendet edhe emri i Irakli Davella, 47-vjeçar nga Mesopotami i Finiqit, i cili u vra sot në Athinë. Davella është identifikuar si një personazh kontrovers me lidhje të forta midis Athinës, Korfuzit dhe Sarandës, duke pasur edhe pasuri të paluajtshme në këto zona.
Dokumenti zyrtar i diskutuar nga partia “SYRIZA” vë në dukje lidhjet e njëri prej anëtarëve të këtyre grupeve kriminale dhe përmban informacione të marra nga burime të ndryshme, duke përfshirë media greke. Grupi përmendet me emra të njohur, mes të cilëve janë edhe mafiozët grekë Vasilis Grivas (i vrarë në 2017), Jorgos Litsas (i vrarë në 2018) dhe Manolis Karaggianis (i vrarë në 2018), si dhe Irakli N. Davella. Grupi në fjalë, i quajtur “B”, përfshin gjithashtu shumë shqiptarë, ndër të cilët bie në sy emri i Evis Shytit, një shqiptar 40-vjeçar i arrestuar këtë vit për lidhje me një grup gjobvënësish dhe përfshirje në një shpërthim eksplozivi në Pire.
Ky grup akuzohet për aktivitete kriminale të tilla si “organizatë kriminale”, “vrasje”, “tentativë vrasje”, “gjobvënie”, “grabitje”, “tentativë mashtrimi”, “pastrim parash”, etj. Endë nuk është e qartë se cilat nga këto vepra mund të jenë të lidhura drejtpërdrejt me veprimtarinë e 47-vjeçarit Davella.
Përsa i përket biznesve të tij, Irakli Davella ka marrë nënshtetësi greke në vitin 2009. Ai ishte pronar i një lokali në zonën e Peristerit në Athinë dhe gjatë verës kishte një aktivitet të automjeteve me qera në ishujt grekë. Në vitin 2006, ai regjistroi një biznes në Delvinë, Shqipëri, me një vendim të Gjykatës së Sarandës, që përfshinte një kafe-bar-restorant dhe tregëtimin e artikujve të ndryshëm dhe pijeve alkoolike. Ky biznes është ende aktiv dhe ndodhet në Mesopotam, Bashkia Finiq. Po ashtu, në vitin 2020 ai regjistroi një tjetër biznes në fshatin Xarrë të Bashkisë Konispol për kultivimin e agrumeve, i cili tani është çregjistruar.
