Babai i 17-vjeçarit, i cili u plagos nga një bashkëmoshatar në një shkollë të mesme në Fier, ka ndarë detaje mbi ngjarjen e rëndë. Ai tregon se kur ka arritur tek djali i tij i plagosur, ka mbajtur duar mbi kokë nga shqetësimi. Sipas tij, nuk kishte dijeni për një konflikt të mundshëm mes të rinjve, dhe nëse do ta kishte ditur, do të kishte reaguar më herët.
“Kam dalë në mëngjes në orën 8 me djalin për të shkuar në punë. Ai shkoi në shkollë, ndërsa unë u nis për punë me familjen. Ndërsa isha duke shkuar, mësuesja kujdestare më telefonoi dhe më tha se djali ishte goditur, por nuk kishte dëmtime të rënda. U ktheva menjëherë dhe shkova në urgjencë. Atje, kur e pashë, mbajta duar mbi kokë nga dhimbja dhe shqetësimi. Nuk isha në dijeni të asnjë konflikti, dhe po të dija, mund të isha reaguar", tha ai.
Babai kërkoi drejtësi dhe më shumë llogaridhënie nga shkollat, duke shprehur pasigurinë e tij për djalin dhe duke thënë se nuk do ta dërgojë më në shkollë derisa të sigurohet për sigurinë e tij. "Unë dua që drejtësia të vendoset, dhe jo vetëm në Tiranë, por edhe këtu. Sot ishte djali im, nesër mund të jetë djali i dikujt tjetër. Nuk kam besim dhe nuk do ta çoj më në shkollë, nuk ka siguri. Policia duhet të jetë atje, ndërsa rojat janë të paefektshme", u shpreh ai.
