Në një postim të bërë dje në platformën e tij Truth Social, Donald Trump ka akuzuar këngëtaren Beyoncé për “shkelje të ligjit zgjedhor”, duke pretenduar se ajo është paguar 11 milionë dollarë nga fushata e Kamala Harris për të mbështetur kandidaturën e saj gjatë një eventi në Hjuston në tetor të vitit 2024.
“Nëse kjo do të kishte ndodhur në krahun republikan, gjithë Ferri do të ishte çliruar,” shkruan Trump, duke kërkuar një hetim të menjëhershëm dhe ndëshkime për çfarë e cilësoi si “kontribut të paligjshëm” dhe “manipulim të procesit zgjedhor”.
Por dokumentet zyrtare të Komisionit Federal të Zgjedhjeve (FEC) tregojnë se Parkwood Entertainment, kompania e Beyoncé-s, ka marrë vetëm 165,000 dollarë, të regjistruara si shpenzime teknike për organizimin e eventit, jo për ndonjë pagesë personale apo endorsement.
Akuzat e Trump kanë përfshirë edhe emra të tjerë të njohur si Oprah Winfrey dhe Bruce Springsteen, të cilët ai i përmendi si përfitues të pagesave të ngjashme për të promovuar Kamala Harris-in, ndonëse asnjë provë konkrete nuk është paraqitur për këto pretendime.
Fushata e Harris ka mohuar çdo pagesë për endorsement dhe ka deklaruar se të gjitha shpenzimet janë bërë në përputhje me ligjin federal zgjedhor. Edhe përfaqësues të Beyoncé-s dhe familjarë të saj kanë reaguar duke i quajtur pretendimet “të rreme” dhe “të motivuara politikisht”.
Ndërkohë, vëzhguesit e fushatave dhe ekspertët ligjorë i kanë konsideruar akuzat si të pabazuara, duke theksuar se një performancë apo paraqitje në event fushate e kompensuar si shpenzim organizimi nuk përbën shkelje ligjore, për sa kohë deklarohet sipas rregullave të FEC.
? Deri tani, asnjë institucion nuk ka nisur një hetim zyrtar mbi këtë çështje. Lëvizja e Trump shihet gjerësisht si pjesë e ofensivës së tij politike ndaj Kamala Harris, e cila është gjithnjë e më shumë në qendër të vëmendjes si pasuese potenciale e kandidaturës demokrate për president.
