Organizata Botërore e Shëndetësisë (OBSH) ka ngritur alarmin për një krizë të rëndë humanitare në Rripin e Gazës, ku sipas të dhënave të saj, kequshqyerja ka arritur në nivele alarmante. Vetëm në muajin korrik janë regjistruar 63 vdekje nga kequshqyerja – përfshirë 24 fëmijë nën pesë vjeç – nga gjithsej 74 raste të raportuara që nga fillimi i vitit.
Sipas OBSH-së, shumica e viktimave kanë ndërruar jetë menjëherë pas mbërritjes në institucionet shëndetësore ose pak pas pranimit, duke treguar shenja të dukshme të humbjes ekstreme të peshës. Agjencia e OKB-së thekson se kjo krizë ishte plotësisht e shmangshme, duke fajësuar një “bllokadë të qëllimshme” dhe vonesa të rënda në shpërndarjen e ndihmave humanitare.
Në qytetin e Gazës, rreth 20% e fëmijëve nën moshën pesë vjeç janë të prekur nga kequshqyerja akute, ndërsa në zonat e Khan Yunis dhe sektorin qendror, normat janë dyfishuar brenda më pak se një muaji. OBSH shton se këto shifra janë ndoshta të nënvlerësuara për shkak të kufizimeve në akses dhe mungesës së sigurisë që pengon familjet të kërkojnë ndihmë mjekësore.
Ndërkohë, Izraeli ka njoftuar një “pauzë taktike” të kufizuar në operacionet ushtarake për të mundësuar hyrjen e ndihmave, por OBSH kërkon që furnizimet me ushqim dhe barna të vijojnë pa ndërprerje dhe në mënyrë të qëndrueshme.
Në dy javët e para të korrikut, mbi 5,000 fëmijë u trajtuan për kequshqyerje, nga të cilët 18% kishin formën më të rrezikshme – kequshqyerjen ekstreme akute. Po ashtu, 40% e grave shtatzëna dhe atyre që ushqejnë me gji po vuajnë nga kequshqyerja ekstreme.
“Nuk është vetëm uria që vret njerëzit, por edhe kërkimi i dëshpëruar për ushqim,” paralajmëron OBSH, duke theksuar se shumë familje detyrohen të rrezikojnë jetën për të siguruar pak ushqim në kushte të rrezikshme dhe kaotike.
